सुधाताईंच्या समग्र मानव कल्याणकारी कार्याची आता चळवळच बनली आहे. सर्व विचारसुत्र आणि कृती कार्यक्रमासाठी सुमारे 30 लाख लोक या चळवळीत सामील झाल्याचे चित्र आश्वासक आहे. यातूनच संस्कृतीचे सुंदर चित्र व चरित्र आकाराला येईल ही अपेक्षा! अस्सल जीवनानुभवाच्या बळावरील सुलभ - सोप्या भाषेतील नाटय आणि कविता अनेक पैलूंना जन्म देतात. या सर्व नाटिकांचे शेकडो प्रयोग यशस्वी होतात व सकारात्मक परिणाम करून जातात. सुधाताईंचे स्त्रित्व प्रगल्भ व चिंतनशील असून समग्र मानवतेला पोटात घेणारे आहे. अशाच सत्यनिष्ठ विवेकी व विधायक प्रवृत्तीच्या लेखनाची समाज-संस्कृतीला गरज आहे. कारण भारतीय संस्कृतीसह विश्व संस्कृती मधील मानवता सर्वार्थाने सुखी करण्याचे आव्हान समस्त लेखक-कलावंत-विचारवंताना पेलायचे आहे. सुधाताई कांकरियांनी एक स्त्री, डॉक्टर व लेखक म्हणून आपले मानवतानिष्ठ कर्तव्य चोख बजावले आहे. 

                                                                                                - डॉ. श्रीपाल सबनीस